Ligji për Qendrën Historike të Prizrenit, edhe pse ka hyrë në fuqi para dy viteve me shumë kontestime, ende nuk ka arritur të implementohet plotësisht. Për këto dy vite janë raportuar me dhjetëra raste të ndërtimeve pa leje dhe dëmtimit të pronave të trashëgimisë kulturore, e që komuna dhe organet tjera që parashihen me ligj, nuk kanë ndërmarr asgjë.
Organizata joqeveritare ‘Ec Ma Ndryshe’, e cila është marrë më së shumti me këtë problem dhe jo vetëm, konsideron se kjo gjendje veç sa e ka rritur bilancin e përgjithshëm të degradimit të qytetit kur këto raste ia shtojmë atyre që kanë ekzistuar para hyrjes në fuqi të ligjit, shkruan Tribuna.
“Prizreni sot është më i shëmtuar se para një viti, më i degraduar se para dy vitesh. Në këtë përvjetor të ligjit, pyetja që vazhdon të jetë aktuale është e thjeshtë: cili ka qenë qëllimi i miratimit të këtij ligji?”, shkruhet në rrjetin social të organizatës joqeveritare Ec Ma Ndryshe. Kjo e fundit konsideron se Prizreni dhe ligji për qendrën e qytetit janë tregues tipik të një shteti të dështuar dhe të kriminalizuar.