Në një kohë kur ndërkombëtarët po intensifikojnë thirrjet për dënimin e presidentit rus, Vladimir Putin, i cili është akuzuar për armatosjen e rebelëve ukrainas të cilët me një raketë tokë-ajër goditën një avion, Putin është parë të shkojë në kishë.
Fotot e Putinit në kishën ortodokse janë publikuar pasi Ukraina thotë se Rusia ka hequr 38 trupa nga vendi ku u rrëzua avioni për të zhdukur prova.
Autoritetet ruse janë vënë nën presion të madh pasi presidenti amerikan, Barack Obama, delegatët ndërkombëtar të OKB-së dhe kryeministrja e Australisë folën kundër regjimit të Putinit.
“Ne e dimë që ata (rebelët) janë të armatosur rëndë dhe janë të trajnuar si dhe ne e dimë që ky nuk ishte një incident. Kjo ndodhi për shkak të mbështetjes së Rusisë”, tha Obama.
Ndërkohë, ambasadorja e SHBA-se në OKB, Samantha Power tha në takimin emergjent të Këshillit të Sigurisë në OKB se, përgjegjësia është e qartë, Rusia ka armatosur rebelët.