Mbrëmë në orët e vona, ka përfunduar festivali mbarëkombëtar folklorik “Oda e Llapushës”, i organizuar nga Komuna e Malishevës, përkatësisht drejtoria për Kulturë, rini dhe Sport, festival i cili është mbajtur në kuadër të shënimit të Ditëve të Mërgatës. Fitues të këij festivali, ishin SHKA “Shote Galica” nga Drenasi dhe “Bijtë e Sefë Mleqanit” nga Mleqani i Malishevës.
“Këto dy ditë Malisheva pas gjithë atyre sakrificave e flijimeve sublime e krenare ka festë, ka festën e folklorit burimorë që çdo herë jehoi me bukurinë dhe melodinë e tij në këtë trevë. Ju të gjithë pjesëmarrës nga Kosova, Shqipëria, Maqedonia, Mali i Zi, nga Lugina e Preshevës e nga Diaspora që çdo herë kontribuoni shumë na zbukuruat qytetin tonë, dhatë dritë me zërin tuaj të bukur e me vallet e mrekullueshme edhe atëherë kur dritat elektrike nuk na punonin mirë”, tha mes tjerash në fjalën e hapjes së natës finale, drejtoresha për kulturë, rini dhe sport, Blerta Krasniqi, e cila i falënderoi të gjithë për kontributin e dhënë në mbajtjen e festivalit.
Pas paraqitjes në dy netët e festivalit, juria profesionale në përbërje nga prof.Dr. Adem Zejnullahu, prof.Dr. Mehmet Rukiqi dhe Sami Piraj, i kanë vlerësuar rapsodët dhe grupet.
Vendi i parë dhe çmimi kryesor i festivalit “Sali e Feriz Krasniqi”, ju nda SHKA “Shote Galica” nga Drenasi dhe rapsodëve “Bijtë e Sefë Mleqanit” nga Mleqani. Vendi i dytë ju nda “Vëllezrve Kryeziu” nga Mleqani dhe vendi i tretë ju nda rapsodëve Bajram Baja me grupin nga Banja dhe Sylë Nishorit nga Theranda.
Çmimi i “Veterani i folklorit” ju nda rapsodit Sejdi Morina, ndërsa çmimi “Beqir Gashi”, për debutuesit më të mirë ju nda Pëllumb Gashit nga Drenasi dhe çmimi i karrierës ju nda rapsodit Ali Krasniqi.
Çmimin kryesor “Sali e Feriz Krasniqi” e ka ndarë, kryetari i Komunës së Malishevës, Ragip Begaj.
Ky festival, do të jetë tradicional./PrizrenPress.com/