Në konkursin për mësimdhënës në 5 shkolla fillore të mesme të ulëta dhe 4 të mesme të larta të Komunës së Rahovecit, për vitin shkollor 2014-15, sipas të dhënave zyrtare, janë paraqitur 417 kandidatë për gjithsej 45 vende të lira të punës, shkruan Koha Ditore.
Behar Rama, drejtor në Drejtorinë e Arsimit, thotë se në katër shkolla të mesme për 38 vende të lira për mësimdhënës matematike, gjuhë angleze,fizikës,lëndëve të ekonomisë, bujqësisë, juridikut dhe informatikës kanë aplikuar 336 kandidatë.
Sipas tij, interesim më të madh kandidatët kanë shprehur për shkollën e mesme të lartë profesionale “Selajdin Mullabazi-Mici” në Rahovec, ku për 17 vende të lira janë paraqitur 183 kandidatë,kurse për lëndën e ekonomisë kanë aplikuar 68 persona.
Nga ana tjetër, zyrtarë komunalë për punësim, kanë bërë me dije se prej 6 mijë punëkërkuesve,146 sish janë me degë të fakulteteve të ndryshme, të cilët prej vitesh presin të punësohen.