Krahas filmave dhe dokumentarëve që mund t’i shikosh në “DokuFest” dhe t’i marrësh me vete mbresat që të lënë ata, nga Prizreni i bukur, mund të keni edhe ndonjë kujtim si çantë, gotë apo bluza që mbajnë moton e “DokuFestit”.
“Kemi gjëra duke filluar nga pesë deri në gjashtë lloje të maicave, çantat, gota, stempa për çanta, që në përgjithësi shiten shumë”, ka thënë për “Zërin” Gent Reshtani, pjesë e stafit të “DokuFestit”. Ai thotë se në “DokuShop” merren me shitjen e të gjitha paisjeve që e vetëfinancojnë “DokuFestin”.
“Presim që në ditët në vazhdim të shesim edhe më shumë duke e marrë parasysh se në ditët e fundit programi është më intenziv, si në filma ashtu edhe në muzikë”, ka thënë Reshtani, për të shtuar se janë të kënaqur me shitjet që janë bërë bërë deri më tani.
Bluzat për të rritur, për të dy gjinitë kanë çmimin prej 8 eurove, ato për fëmijë kanë çmimin prej 6 eurove, ndërsa bluzat me mbishkrimin “DokuTech” kushtojnë 7 euro. Në “DokuShop” janë të ekspozuara e në shitje edhe bluzat e edicioneve të viteve të shkuara, që kanë çmimin prej gjashtë eurosh. Gotat, çantat dhe katalogu i edicionit të sivjemë të “DokuFest” kanë çmimin prej pesë eurove, ndërsa butoni kushton një euro.