Agjencia Kosovare e Akreditimit tashmë ka përmbyllur procesin e vlerësimit për institucionet e arsimit të lartë në vend dhe pritet që rezultatet të shpallen më 3 korrik.
Zyrtarë të agjencisë bëjnë të ditur se në vlerësim janë përfshirë rreth 26 institucione private dhe publike. Ndërkohë, pas publikimit të rezultateve universitetet publike dhe private do të shpallin konkursin për pranimin e studentëve të rinj.
Vendimet e Agjencisë për akreditimin dhe ri-akreditimin e programeve do të publikohen më 3 korrik, kur edhe do të mbahet mbledhja e Bordit të Agjencisë.
Kryetarja e Këshillit Kombëtar të Cilësisë, Ferdie Zhushi Etemi, tha për Radio Kosovën se çdo gjë ka shkuar mirë gjatë procesit të vlerësimit në institucionet e arsimit të lartë. Në prag të shpalljes së konkursit nga ana e institucioneve për pranimin e studentëve të rinj, Zhushi-Etemi, bëri të ditur për maturantët se të gjitha programet e akredituara nga agjencia e akreditimit ofrojnë cilësi.
”Mund të ketë dallime në cilësi të këtyre programeve, mund të ketë programe që janë me të vërtetë shumë të mira e cilësore, por mund të kemi të fushës së njëjtë edhe programe që kanë arritur kriteret por duhet edhe më tutje të bëhet diçka në përmirësimin e tyre. I ftoj maturantët që të kenë qasje, të shikojnë e të informohen”, deklaroi ajo.
Zhushi Etemi, bëri të ditur se në vlerësim janë përfshirë rreth 26 institucione private dhe publike. Ndërsa ende nuk janë në listë për akreditim institucionet e reja në themelim.
“Momentalisht kemi 23 institucione private, kemi tri Universitete Publike që tashmë funksionojnë, në themelim e sipër janë institucionet e reja të cilat nuk i kemi në listë për shkak se nuk e kanë kaluar procesin e vlerësimit të jashtëm. Atyre do tu duhet kohë që të përgatiten, nuk startojnë nga zero por tashmë janë njësi të UP-së të cilat qeveria ka marrë vendim që t’i ngrejë në nivel të institucioneve të pavarura dhe në të ardhmen kjo ofertë do të zgjerohet”.
Ajo që e shqetëson më shumë kryetaren e Këshillit Kombëtar të Cilësisë, është se shumë oferta nga këto institucione janë klasike. Sipas saj, studentëve ju duhen programe aktuale, për shkak se mundësitë e punësimit janë më të mëdha nëse programet janë interdisiplinare.
Ndërkohë, universitetet publike dhe kolegjet private, ende nuk kanë bërë të ditur se kur do të shpallin konkursin për pranimin e studentëve të rinj, pasi presin rezultatet e Agjencisë së Akreditimit.