Shpallja e zgjedhjeve të jashtëzakonshme nuk pritet ta zërë në befasi Komisionin Qendror të Zgjedhjeve. Ky komision ka nisur përgatitjet, në rast se presidentja e vendit, Atifete Jahjaga, vendos t’i shpallë zgjedhjet e jashtëzakonshme.
Një anëtar i këtij komisioni ka treguar për gazetën në kushte anonimiteti se ka filluar mobilizimi i KQZ-së. Sipas tij, ditëve të fundit janë mbajtur edhe disa punëtori, qëllimi i të cilave ka qenë përgatitja për zgjedhje.
“Lëvizjet brenda KQZ-së po ndodhin. Ditëve të fundit janë mbajtur edhe disa punëtori ku pjesëmarrës kanë qenë përfaqësues të këtij institucioni, e qëllimi i të cilave ka qenë përgatitja për zgjedhje”, ka thënë ky anëtar i KQZ-së. E në këtë institucion thonë se KQZ është e obliguar që të organizojë zgjedhje kurdo që ato shpallen./tribuna/
Zëdhënësi i KQZ-së, Valmir Elezi, ka thënë për gazetën se nëse vendi shkon në zgjedhje, atëherë për shkak të afatit të shkurt kohor do të shkurtohej edhe koha për kryerjen e operacioneve të ndryshme zgjedhore. Mirëpo sipas tij, ky institucion, mbetet i përkushtuar në kryerjen e obligimeve kushtetuese dhe ligjore..