Jo të gjithë fëmijët e dëshmorëve kërkojnë privilegje për tu futur në Universitetin e Prishtinës, pa iu nënshtruar provimit pranues, ashtu siç ndodh rëndom me studentët tjerë.
Këto ditë kur po bëhet zhurmë e madhe rreth kësaj çështje, ku kërkesa për hyrjen e fëmijëve të dëshmorëve në UP s’ka të ndalur nga Shoqata e Veteranëve të UÇK-së, Riad Asllani – djali i njërit prej dëshmorëve që ka Kosova – ka reaguar lidhur me këtë çështje.
Në një postim të tij në FB thotë se nuk e dëshiron aspak këtë privilegj. Madje, e konsideron përulje dhe jo privilegj.
“Jam fëmijë dëshmori. Por, vitin e kaluar, kur aplikova në fakultet, nuk më zinte gjumi natën, duke i pritur rezultatet. Dolën dhe u pranova. Po pse s’më zinte gjumi natën? Sepse do e nënshkruaja që të vdisja me diplomë të shkollës së mesme, e nuk do ta përdorja këtë lloj ‘privilegji’, që për mua është përulës. Unë personalisht nuk kërkoj asgjë në emër të dëshmorit që dha jetën e vet, duke dashur të më shihte ashtu siç jam i lirë”, ka shkruar ai në profilin e tij në Facebook, i cili parapëlqen të jetë student vetëm atëherë kur e meriton një gjë të tillë!