Dega e Aleancës për Ardhmerinë e Kosovës në Rahovec shprehet e shqetësuar me faktin se, mbi 1000 votues, banorë të fshatit Ratkoc të komunës së Rahovecit, janë bartur në qendrën e votimit në Drenoc. Ky proces i dëmshëm bie ndesh me ligjin për zgjedhjet, si dhe me Kushtetutën e Republikës së Kosovës, duke iu mohuar e drejta themelore për të votuar lirshëm dhe në përputhje me vullnetin e tyre.
“Ndryshimi i kodit të qendrës së votimit 1612 (Ratkoc) me kodin 1628 (Drenoc), konsiderojmë se ka prapavijë politike dhe synon të ulë pjesëmarrjen e qytetarëve të këtij fshati në procesin e votinmit. Në këtë mënyrë do të këtë efekt të drejtpërdrejtë në përgjigjen e qytetarëve ndaj krejt procesit zgjedhor”, thuhet në një deklaratë për opinion, të lëshuar nga shtabi zgjedhor i degës se AAK-së në Rahovec.
Kjo parti kërkon nga KQZ-ja që urgjentisht të formojë një komision për vrifikim të gjendjes dhe të krijojë një listë të veçantë të banorëve të fshatit Ratkoc dhe t’iu mundësohet atyre që të vendosin vetë për të ardhmen në komunën e Rahovecit.“Në të kundërtën do të detyrohemi të reagojmë në përputhje me të drejtën qytetare për të protestuar dhe ngritur zërin kundër këtij krimi elektoral”, përfundon deklarata.