Aleanca për Ardhmërinë e Kosovës (AAK) sot ka mbetur pa tetë kryetarë të nëndegëve të Prishtinës dhe njëmbëdhjetë koordinatorë të forumit rinor. Ata kanë vendosur t’i bashkohen Lidhjes Demokratike të Kosovës (LDK).
Sekretari i LDK-së Ismet Beqiri,tha se me këta njerëz LDK-ja do të forcohet edhe më shumë.
“Ju them që do të jeni të mirëpritur në mesin ku ju do të veproni. Dëshirojmë të jeni pjesë aktive edhe e procesit zgjedhor që do ta kemi ose do të fillojë së shpejti në Lidhjen Demokratike të Kosovës, dhe unë ju sigurojë se të gjithë kolegët e mi nëpër nëndegë do t’ju mirëpresim dhe fuqia juaj do të matet edhe me angazhimin tuaj në teren”, tha Beiqiri.
Beqiri tha se këto aderime tregojnë se LDK-ja mbetet një adresë që i tërheq të rinjtë.
Kurse Nazmi Beiqiri, i cili ishte kryetar i njërës nga degët e AAK-së në Kodrën e Trimave, tha se nuk e ka gjetur veten në këtë parti.
“Ne tash e kemi pa që mundemi të kyçemi në proceset zgjedhore të Lidhjes Demokratike të Kosovës. Pakënaqësi nuk ka pas prej të gjithë neve që jemi këtu, mirëpo subjekti politik dhe e drejta e çdo njeriut është ta zgjedhë vetë subjektin politik. Kështu që, kemi zgjedhur shtëpinë e vjetër ku kemi qenë përpara”, tha ai.