Gjykata Themelore në Prizren, e ka publikuar të plotë aktgjykimin, me arsyetimin e lirimit nga akuza të policit Selman Ukzeka, i cili akuzohej për përvetësim në detyrë.
Në arsyetimin e aktgjykimit thuhet se deklaratës së të dëmtuarit S.Sh., gjykata nuk ia fali besimin, i cili pretendon se më rastin e ndalimit në Stacionin Policor në Prizren, përveç gjësendeve tjera, të hollave, ka pasur edhe dy bankënota me nga 5 euro dhe se në regjistrin të cilin e ka nënshkruar nuk i ka parë gjësendet përveç shënimeve personale të tij, nga të dhënat mbi pronën, proces ky i nënshkruar nga i akuzuari S.U., dhe i dëmtuari.
Sipas arsyetimit të aktgjykimit shihet qartë se i ndaluari-i dëmtuari S.Sh., nuk ka pasur dy bankënota me nga 5 euro, por ka pasur vetëm një bankënotë prej 5 euro dhe se nuk është vërtetuar saktësisht se i dëmtuari më rastin e ndalimit, dorëzimit të sendeve a ka pasur një bankënotë në vlerë prej 5 euro apo dy bankënota me nga 5 euro.
Gjithashtu në arsyetim thuhet se gjykata nuk marrë për bazë deklaratën e të dëmtuarit kur tha se nuk ka mundur të dijë formën e letrës së ofruar për nënshkrim, e cila ka pasur vetëm shënime personale, gjitha sendet nuk kanë qenë të shënuara, mirëpo, nga letra mbi pronën shihet qartë se përveç policit-akuzuarit ajo ka qenë e nënshkruar edhe nga i dëmtuari S.Sh.
Po ashtu, në aktgjykim thuhet se deklarimit të dëshmitarit R.B, gjykata nuk mund t’i besoi, pasi që dëshmitari ka deklaruar atë çka e ka dëgjuar nga i dëmtuari kundrejt të akuzuarit S.U. ndërsa në anën tjetër i dëmtuari në deklarimin e tij në asnjë rast nuk e përmend faktin se shumën prej 5 euro ia kishte marr i akuzuari për t’i blerë bukë. Kësisoj deklarimi i këtij dëshmitari është në kundërshtim me të gjitha provat tjera të paraqitura në shqyrtim gjyqësor thuhet në aktgjykim.
Tutje në aktgjykim thuhet se nga leximi i kopjes së formularit mbi të dhënat e pronës, vërtetohet se i akuzuari i kishte regjistruar sendet të cilat i posedonte me vete i dëmtuari me rastin e ndalimit policor, ku e kishte evidentuar shumën prej 5.20 euro.
Në fund thuhet se Gjykata duke e analizuar me kujdes deklarimin e të akuzuarit si dhe nga provat e tjera ia fali besimin në tërësi deklarimit të akuzuarit, pasi që edhe nga i dëmtuari dhe nga provat materiale u vërtetua një gjendje tjetër faktike e kundërt e atë të Prokurorisë Themelore në Prizren.
Pa ashtu, në fund të aktgjykimit thuhet se Gjykata përfundimisht me anë të provave të administruara nuk mundi të vërtetoi fajësinë e të akuzuarit pasi të gjitha provat e sidomos deklarimi i të dëmtuarit S.Sh., e cila ishte e paqartë dhe konfuze dhe provat materiale ishin në favor të akuzuarit. Në fakt deklarimet e të dëmtuarit dhe dëshmitarëve R.B., dhe B.K., ishin në kundërthënie pasi që vetë i dëmtuari në asnjë rast nuk e dinte sa para i kishte me vete me rastin e ndalimit, përderisa dëshmitarët në fjalë kishin deklaruar rrethana tjera që nuk lidhen me deklarimet e të dëmtuarit.
Andaj duke u bazuar në provat e lartcekura nuk u vërtetua fajësia e të akuzuarit dhe në këtë mënyrë gjykata e ka liruar nga akuza të akuzuarin në kuptim të nenit 364 par.1 pika 1.3 të KPP-së.
Ndryshe sipas aktakuzës së Prokurorisë Themelore në Prizren, e ngritur më 31 tetor 2019, Selman Ukzeka akuzohet se me 10 maj 2019, në cilësinë e zyrtarit policor në Qendrën e Ndalimit në Stacionin Policor “Alfa” në Prizren, me qëllim të përfitimit të kundërligjshëm të dobisë pasurore, përvetëson pasurinë e cila i është besuar për shkak të detyrës apo pozitës së tij.
Në aktakuzë thuhet se i akuzuari, pa ia marrë shënimet personale të ndaluarit-të dëmtuarit Sylë Shala, i drejtohet me pyetjen: “A janë këto gjësende, 2×5 euro, aksesori, ora e dorës dhe kuleta e juaja?” dhe në momentin kur i ndaluari shfrytëzon tualetin, i akuzuari bën regjistrimin e gjësendeve, me ç ’rast përvetëson njërën nga bankënotat prej pesë euro.
Sipas aktakuzës, kur i dëmtuari del nga tualeti, i pandehuri ia jep formularin për nënshkrim, e bastis në trup dhe e dërgon në dhomë.
Tutje, në aktakuzë thuhet se i pandehuri, pas 30 minutave, shkon në dhomën e ndalimit dhe e pyet të dëmtuarin për disa kartëmonedha të huaja, të cilat pasi i nxjerr nga kuleta ia ofron të dëmtuarit në shikim, e më pas në formular të pranimit e regjistron se i dëmtuari, përveç gjësendeve të lartpërmendura, i ka pasur vetëm 5 euro e 20 cent. /BetimipërDrejtësi