Anton Berishaj, Ushtrues detyre i Rektorit të UP-së, ka kërkuar nga Këshilli Drejtues hapësirë për të vepruar e për ta bërë këtë gjë siç duhet.Anton Berishaj e kishte pasur një kërkesë si kusht për të pranuar ofertën e Këshillit Drejtues që t’i hyjë garës për postin e ushtruesit të detyrës së rektorit të Universitetit të Prishtinës.Në intervistën dhënë “Kohës Ditore”, të parën pas marrjes së postit, Berishaj ka kërkuar nga Këshilli Drejtues hapësirë për të vepruar. Për ta bërë këtë gjë siç duhet, ka thënë se ka kërkuar që t’i lejohet t’i zgjedhë vetë bashkëpunëtorët dhe pa u penguar nga askush.
Gjithashtu, ka thënë se ka kërkuar që të lihet i qetë në marrjen e vendimeve dhe se nuk dëshiron të bëhet marionetë e askujt, as e politikës.
Ka folur edhe për atë premtimin që e ka bërë për ndarjen e UP-së nga politika, e
për publikimin e të gjitha CV-ve të stafit akademik që punon në UP.
Në pyetjen se si do ta bëjë atë ndarje të UP-së nga politika, Berishaj është përgjigjur:
“Ja si e kuptoj unë këtë gjë: të mos më instalohen kuadro që punojnë për shije të politikës, ata që së pari e mbrojnë politikën, apo interesat e një partie të caktuar politike, e më vonë nëse mundet të gjendet një fije që mund të puqet edhe me interesat tona, të UP-së, studentëve. Nuk dua këtë. Unë kërkoj respektim të statutit pikë për pikë. Që kur të hape konkursi për një asistent apo profesor, të mos biem pre e telefonatave dhe e presioneve për të pranuar ose jo dikë në punë. Ai do të zgjidhet vetëm nëse i pranon kriteret. As më shumë as më pak. Dhe me këtë unë nuk po i shpall luftë politikës, sepse nuk jam i çmendur. Dhe as nuk dua që njerëzve t’ua largoj nga kokat bindjet politike. Le të merret kush të dojë me politikë, por nuk dua që ajo të reflektohet në punën time…”.