Deputeti i PDK-së, Bekim Haxhiu gjatë kohës së deklarimeve jashtë rendit të ditës në Kuvendin e Kosovës, ka shprehur shqetësimin e tij dhe të shumë prindërve për çantat shkollore të stërngarkuara me libra, të cilat po u shkaktojnë nxënësve deformime të shtyllës kurrizore.
Sipas Haxhiut, Organizata Botërore e Shëndetit (OBSH) ka përcaktuar se ngarkesa fizike te fëmijët nuk guxon të kalojë 10 përqindëshin e peshës trupore të tyre. “Dua të potencoj shqetësimin tim dhe të shumë prindërve, e që ka të bëjë me rritjen e peshës së çantave të fëmijëve tanë, e cila nga viti në vit po mbingarkohet, po bëhet çdoherë e më e rëndë dhe kjo është një çështje serioze për shëndetin e nxënësve e brengë për prindërit dhe mësimdhënësit. Si pasojë e mbingarkesave të çantave të nxënësve, po krijohen deformime të shtyllës kurrizore te fëmijët, i njohur si problem shëndetësor i skoliozes idopatike”, është shprehur Haxhiu, shkruan Epoka e re. Në këtë kontekst Haxhiu ka kërkuar nga MASHT-i që të hartojë një planprogram të ri dhe bashkëkohor, një planifikim profesional edukativ, duke iu mundësuar nxënësve që një pjesë të librave të mos e bartin në shtëpi, por ta lënë në raftet e klasave, duke e harmonizuar orarin nga mësimdhënësit.