Këshilltari i Lartë i Kryeministrit të Kosovës, Bekim Çollaku ka reaguar ndaj deklaratave të zyrtarëve të Serbisë, të cilët thonë se marrëveshja ndërmjet Kosovës dhe Serbisë është “status neutrale” dhe për rrjedhojë edhe zgjedhjet lokale të nëntorit në Kosovë duhet të mbahen pa simbole shtetërore të Republikës së Kosovës.
“Deklaratat e tilla janë jorelevante për këdo që ka njohuri elementare për përmbajtjen e marrëveshjes ndërmjet Kosovës dhe Serbisë. Edhe nën supozimin e tillë të paqëndrueshëm, marrëveshja nuk mund të konsiderohet dhe as interpretohet si status neutrale në raport me qytetarët, respektivisht shtetasit e Kosovës. Në të gjitha parimet e marrëveshjes që ndërlidhen me gjyqësinë, policinë, zgjedhjet etj, saktësohet qartë se të gjitha këto çështje do të rregullohen në përputhje me ligjet e Kosovës. Kjo është e vërteta e marrëveshjes”, tha Çollaku, për Express.
Duke folur për formën dhe përmbajtjen e fletëvotimeve, Çollaku deklaroi se kompetent për të vendosur është Komisionin Qendror i Zgjedhjeve, që është një mekanizëm në të cilin janë përfaqësuar të gjitha partitë politike parlamentare të Kosovës.