Krijimi pa mbulesë dhe pa asnjë frikë e pasurisë marramendëse të pushtetarëve e politikanëve kosovarë, që dyshohet se është fituar në mënyrë antiligjore dhe të pashpjegueshme, duke i bërë kësisoj ata edhe si shtresën më të pasur në Kosovë, sipas analistëve dhe njohësve të kësaj fushe, është bërë për shkak se politika dhe drejtësia janë në një martesë të vazhdueshme. Prandaj, kjo politikë qëllimisht ende nuk e ka bërë ligjin antimafia, ngase po të bëhej ligji në fjalë, sipas tyre, të gjitha këto fare lehtë do të zbuloheshin dhe nuk mund të fshiheshin dhe përveç tjerash do të konfiskohej pasuria e fituar në mënyrë me korrupsion dhe forma të tjera të krimit të organizuar.
Veç kësaj është shtruar edhe pyetja se përse Kosova nuk ka mekanizma ligjorë e institucionalë të besueshëm dhe kredibil për hetimin serioz se si politikanët kosovarë u bën të milionerë e multimilioner brenda një kohe shumë të shkurtër, pasi ka një shpërputhje të madhe të pasurisë me pagat që ata i marrin. Po ashtu është ngritur edh pyetja se pas gjithë kësaj, pse hesht dhe nuk vepron Prokuroria Speciale e Republikës së Kosovës, dhe a ka shpresë se më në fund kjo e fundit do të nisë hetimet serioze kundër zyrtarëve e politikaneve të dyshuar si të korruptuar që po zhvatin buxhetin e shtetit duke ua nxirë jetën qytetareve të këtij vend.
Dibrani: Asnjë politikan nuk është bërë multimilioner, pa e ditur edhe prokurorët Analisti Shefqet Dibrani në një prononcim për gazetën, “Kosova Sot”, ka thënë se tashmë dihet se shtresa më e pasur në Kosovë janë pushtetarët politik, të cilët nuk kanë asnjë veprimtari prodhuese e profitabile, derisa sipas tij, kjo e dhënë është e mjaftueshme për të kuptuar rrugën e vërtetë të pasurimit të tyre.
“Po ashtu shtresa politike është më së paku e arsimuar dhe kjo kuptohet fare lehtë nga secili, qoftë nga diskutimi i tyre në parlament apo në mediumet publike, e qoftë në takime të drejtpërdrejta, por siç janë kamur me pasuri po aq janë të pajisur me grada akademike e tituj shkencorë, madje edhe vlerësimet dhe çmimet zakonisht ndahen vetëm për ta. Prandaj, shoqëria jonë është në krizë të thellë, e kjo vjen nga kjo shtresë oligarkësh, të cilët edhe nëse i kanë dërguar fëmijët e tyre nëpër universitetet më të mëdha botërore, të rrallët janë fëmijët e kësaj kategorie, që pajisen me dije e kulturë për t’i shërbyer vendit dhe të ardhmes së tij. Ai shton se kudo nëpër universitete ka nota minimale kaluese, dhe ato maksimale të cilat fitohen me mund, angazhim dhe përpjekje të mëdha. Dibrani ka shtuar se pa dyshim, në Kosovë nuk është bërë asnjë multimilioner pa e ditur edhe prokurorët, derisa sipas tij janë marrëveshje të ndërsjella, për të cilat një pjesë e përgjegjësisë bie mbi drejtësinë.
“\Sikur nuk kemi politikan të dënuar të cilëve iu ka konfiskuar edhe pasuria, nuk kemi në anën tjetër as prokuror e gjykatës që janë dënuar pse nuk e kanë kryer punën si duhet. Madje nuk është dënuar askush pse ka shkelur ligjin dhe as prokuror që nuk e kanë respektuar atë. Përndryshe, asnjë politikan nuk ka mundësi të këtë krijuar pasuri nga të ardhurat e tyre sado të mëdha le të jenë ato sepse shpërputhja është aq e madhe sa nuk bëhet më”, shprehet Dibrani. Tutja ai shton se në kundërshtim me ligjin kanë nga dy -tre paga që i marrin në të njëjtën kohë duke mos shkuar kurrë në atë institucion, i cili i paguan politikanët nga taksapaguesit e Kosovës./kosova sot/