Enkelejdi është konsideruar si një nga konkurrentët më të bukur të reality show-t “Big Brother”. Shumë e krahasojnë djaloshin biond me aktorin e famshëm Brad Pit, dhe vetëm me pamjen e tij, ai ka bërë shumë fansa, kryesisht femra. Enkelejdi u eliminua nga shtëpia e famshme, pa e ditur që jashtë e priste një vëmendje e madhe dhe shumë njerëz që donin ta takonin. Megjithatë ai është djalë serioz, shumë i dashuruar me bashkëshorten, dhe famën po e shijon “brenda caqeve të lejuara”. Në këtë intervistë për “Bluetooth”, i eliminuari i radhës nga shtëpia e “Big Brother”, rrëfen se ndoshta do e shohim sërish në televizion; kësaj here në filma artistikë apo si prezantues emisionesh.
A e prisje që të premten e shkuar do të të eliminonin ty?
Edhe e prisja, edhe s’e prisja. Mendoj që më eliminuan, sepse këto javët e fundit nuk jam shprehur fare. Isha mbledhur në vete dhe nuk flisja shumë. Nuk merresha dot me thashetheme dhe spiunllëqe. Nuk shprehja mendimin tim dhe nuk vija në dukje të këqijat e të tjerëve, siç bënin ata gjithë kohën.
Çfarë ndodhi natën pasi dole nga shtëpia? Ku shkove, kë takove?
Në fillim isha në studio, ku takova edhe babin. Pastaj na çuan në një club, dhe pastaj shkova në shtëpi.
Kemi parë foto të tuat ku përqafohesh me disa femra. E mendoje që kishe bërë kaq shumë fanse femra?
Të them të vërtetën, nuk e kisha menduar. Të gjithë fansat që kam bërë më kanë treguar shumë dashuri. Vlerësimi i tyre më jep shumë forcë. Çdo ditë më ndalojnë njerëz të moshave të ndryshme, jo vetëm vajza të reja. Ka shumë gjyshe me nipërit dhe mbesat e tyre, ka njerëz të moshës së prindërve të mi, ka moshatarë të mitë, fëmijë të vegjël, dhe të gjithë më flasin me dashamirësi.
Megjithatë, fanset e tua më të mëdha janë vajzat, që të pëlqejnë për pamjen tënde… Çfarë të thonë ato kur të takojnë?
“Enkelejd, a mund të bëjmë një foto?” (qesh). Disa të tjera më ftojnë për kafe. Shumë të tjera më shkruajnë në “Facebook”.
Të ka shprehur ndonjëra dashurinë në “Facebook”? Apo vetëm të bëjnë komplimente?
Të dyja këto (qesh).
Me bashkëshorten, je takuar?
Jo, sepse ajo banon në Nju York. Kemi folur në telefon dhe plani i saj është që të vijë sa më shpejt këtu, për të qëndruar pranë meje.
Çfarë të ka thënë ajo për qëndrimin në “Big Brother”?
Më tha që më ndiqte gjithë kohën me familjen dhe me miqtë e saj. Më tha që e kam bërë krenar dhe që duke më parë atje ra në dashuri me mua për herë të dytë (qesh).
A bëhet Suzana xheloze për ty? A e rrezikon distanca dhe fama jote marrëdhënien tuaj?
E kemi biseduar edhe këtë, ndaj plani është që ajo të vijë sa më shpejt e të jemi bashkë. Suzana është xheloze, por jo deri në çmenduri. Nuk më bezdis shumë me pyetje. Kuptohemi mirë dhe kemi besim tek njëri-tjetri. Duke qenë se e kemi jetuar lidhjen në distancë, ka pasur edhe momente krize apo xhelozie, por duke biseduar, gjithmonë kemi gjetur mënyrën për të qëndruar me njëri-tjetrin. Çfarëdo që të ndodhë, ne jemi të vetëdijshëm që duhemi fort dhe do vazhdojmë bashkë.
Çfarë planesh ke për më vonë? Ku do të jetosh dhe çfarë pune do të bësh?
E vërteta është që, po pres oferta për punë dhe në bazë të tyre do të vendos.
Çfarë pune di të bësh ti?
Pasioni im gjithmonë ka qenë kinemaja. Po pres që të më bëjnë oferta për role në filma brenda apo edhe jashtë Shqipërisë. Përveçse të aktroj, mua më pëlqen modelingu dhe televizioni. Normalisht që edhe unë, si të gjithë, kam nevojë për një punë dhe pas kësaj aventure vetëm kam harxhuar dhe s’kam punuar.
Po nëse s’do të marrësh asnjë ofertë, çfarë do të bësh?
Siç kam bërë gjithë jetën. Unë kam punuar që i vogël, ndaj, nëse do të jetë nevoja do t’i kthehem prapë llaçit (qesh).
Pushimet, ku do i kalosh?
Po pres të vijë Suzana dhe bashkë do të vendosim. Do të më pëlqente t’i tregoja asaj pak më shumë nga Shqipëria. Besoj se një pjesë të pushimeve do e bëjmë këtu, dhe ndoshta do lëvizim edhe jashtë. Duke parë e duke bërë.
Nga banorët që kanë mbetur në lojë, sipas teje, kush nuk e meriton të shkojë në finale?
Nuk mund të them asnjë emër, sepse mendoj që, fakti që janë ende brenda do të thotë që secili ka dhënë diçka, qoftë edhe me prezencën e vet.
Kush e fiton këtë edicion?
Do e fitojë ai që është pëlqyer më shumë në publik (qesh). Mendoj dhe uroj që fitorja të ndahet midis Valerit dhe Nevilës.
(er.nu/Bluetooth/BalkanWeb)