Qendra e Studentëve e Universitetit të Prishtinës ka hapur konkursin për pranimin e studentëve për banim në konvikte dhe për ushqim në mensë, për vitin akademik 2023/2024.
Sipas njoftimit, konkursi do të jetë i hapur prej datës 12.09.2023 deri më datën 18.09.2023.
Këtë vit kjo Qendër do të pranojë rreth 4,000 studentë, për strehim, ushqim si dhe hapësirat për studim.
“Studentët e rregullt të UP-së, kanë mundësi të aplikojnë veçmas për të fituar të drejtën për t’u ushqyer në mensën e studentëve. Kriteret për të aplikuar janë të njëjta sikurse për aplikim për konvikt. Numri i studentëve që do të përfitojnë për ushqim në mensë, është 1500 student”- thuhet në njoftim.
Tutje QS ka bërë të ditur se çmimi do të jetë 35 euro për muaj (20 euro banimi, 15 euro ushqimi).
Studentët të cilët do të aplikojnë për strehim dhe ushqim në Qendrën e Studentëve, aplikimin mund ta bëjnë përmes sistemit Online, në adresat zyrtare të QS, web faqes qs.rks-gov.net dhe profilit zyrtar Facebook Qendra e Studenteve-Prishtine.