Rrezet e diellit, në muajin korrik, bien edhe mbi “Gurin e kurbetçarit”, lapidar ky i vendosur në qendër të fshatit Zym të Hasit të Prizrenit.
Me gjithë praninë e diellit, i njëjti nuk shkëlqen. Por ruan ngjyrën e përhimët, karakteristikë kjo e këtij vendbanimi me traditë të gjatë historike e kulturore, shkruan sot “Koha Ditore”.
Madje edhe krijon ndjesinë sikur është humbur ngrohtësia në këtë mjedis. Edhe pse është stina e verës, në rrugët e fshatit nuk shihet njeri. Kjo për faktin se pjesa dërrmuese e banorëve kanë migruar në botën e jashtme, në kërkim të një jetese më të mirë.
90 për qind e banorëve në kurbet
Në kurbet jetojnë rreth 90 për qind e banorëve të Zymit. Prandaj edhe vite më parë, gjatë shënimit të “Ditëve të Diasporës” është përuruar lapidari, që e simbolizon rrugën e kurbetit.
Për dallim prej vendbanimeve të tjera në Kosovë, ku vera sjell në vendlindje mërgimtarët, në Zym nuk ndodh e njëjta gjë, për shkak se shumica e mërgimtarëve të kësaj ane merren me zejen e bukëpjekësit dhe e shfrytëzojnë sezonin e turizmit për punë kryesisht në zonat bregdetare të Kroacisë, por edhe shtetet e tjera të rajonit e Evropës.
Ndërkohë edhe ata pak të rinj, që jetojnë në Zym, gjatë verës ikin për punë sezonale tek të afërmit e tyre në mërgim. Një situatë e tillë bën që në mes të korrikut të mbretërojë qetësia në këtë fshat, që shkon përtej idilës rurale.
Në orët e pasdites, për pak minuta dëgjohet zëri i kambanës së kishës së fshatit, që më pastaj i lë vend cicërimave të zogjve. Lëvizjet janë shumë të rralla.