Kryetari i LDK-së në Prizren, Haxhi Avdyli, i ka quajtur ‘mashtrues ‘ presidentin e Kosovës, Hashim Thaçin dhe kryetarin e Prishtinës, Shpend Ahmetin.
Ai tha se Thaçi i mashtroi qytetarët për formimin e ushtrisë, kurse Ahmeti tregoi se i pëlqen llukësi në jahtë të Budvës.
“Disa liderë të dehur nga mania e lavdisë , vrapojnë që në errësirë të formojnë ushtri në kohën e globalizimit të ombrellës së NATO-s, dhe pastaj një javë ia shpërlajnë trurin popullit, duke i thurur lavde vetes, e në javën e dytë zbythën në guackën personale të mjerimit politik”, shkruan Avdyli në Facebook, transmeton PrizrenPress.
Sipas tij, Thaci me këtë veprim e ka “futur bishtin nën shalë”.
”Lider i mjerë, i padijshëm që ndërton kulla me letra që fryma e mëngjesit ia rrëzon , e pastaj futë bishtin nën shalë duke harruar rrahagjoksin e para një jave”.
Avdyli ka komentuar edhe qëndrimin e kryetarit të Prishtinës, Shpend Ahmetit në jahtë në Budvë.
“ Mashtruesi, që ‘Koka Kolën’ e pin zero, dhe që nuk hipë në xhip, por në autobusë, del që dallaveret e dyshimta për kifle e qumësht i bën në jahtë” .
E përbashkëta e Thaçit dhe Ahmetit, sipas tij, është mashtrimi.
“E përbashkëta e tyre është mashtrimi ,papërgjegjësia, çjerrja e maskave dhe djersitja”./PrizrenPress.com/