Policia në Prizren ka filluar hetimet për dëmtimin e xhamisë së Namazgjahut.
Ajo i ka marrë të gjitha provat në vend të ngjarjes.
Zëdhënësi i Policisë në Prizren, Shaban Osmanollaj tregon se hetimet nuk do të ndalen derisa të kapen dëmtuesit e objektit.
“Policia ka dal në terren dhe i ka mbledhur të gjitha provat dhe ka marrë deklarata të dëshmitarëve “, thotë Osmanollaj për “PrizrePress’.
Sipas tij, policia është e angazhuar që t’i ruajë objektet fetare dhe ato të trashëgimisë kulturore në Prizren.
“Njëri nga prioritetet e policisë është edhe ruajtja e objekteve fetare e kulturore”, shprehet ai.
Këshilli i Bashkësisë Islame në Prizrenit, ka reaguar për dëmtimin e xhamisë së Namazgjahut.
“Pas vërtetimit në vend, ekziston dyshimi i bazuar, se persona të pandërgjegjshëm, qëllimisht i kanë dëmtuar dy shtyllat e kurorës së hytbes në objektin e Namazgjahut, duke synuar rrëzimin e saj”, thuhet në reagimin e BI-së në Prizren.
“Këshilli i Bashkësisë Islame i Prizrenit, kërkon nga Policia e Kosovës, që të ndërmarrë veprimet e duhura, për gjetjen dhe marrjen në përgjegjësi të personave, që e kanë shkaktuar këtë dëm të madh, ndaj xhamisë, si një objekt i rëndësisë së veçantë për trashëgiminë kulturore e historike të Kosovës”.
“Po ashtu, kërkojmë nga Qendra Rajonale e Trashëgimisë Kulturore në Prizren (QRTK), si dhe nga organet e tjera kompetente, lokale apo qendrore, që të ndërmarrin veprimet adekuate për sanimin e gjendjes dhe trajtimin e xhamisë së Namazgjahut, në mënyrë meritore”.
Këshilli i Bashkësisë Islame i Prizrenit, vlerëson se objekti i xhamisë së Namazgjahut, sidomos viteve të fundit, është lënë pas dore dhe pa përkujdesjen e duhur.
“Ambienti brenda tij është i papastër me përplot mbeturina, ndriçimi nuk funksionon, ulëset janë shkatërruar, hapësirat e gjelbërta nuk mirëmbahen fare”.
Edhe kryetari i komunës së Prizrenit, Mytaher Haskuka, ka reaguar për dëmtimet në xhaminë e Namazgjahut në Prizren.
Ai ka ftuar Policinë e Kosovës dhe organet e drejtësisë që t’i gjejnë fajtorët.
“Dëmtimi i pronës publike është vandalizëm dhe i sanksionuar me ligj, ndërsa dëmtimi i monumenteve të trashëgimisë kulturore është vepër penale. Sipas ligjeve në fuqi, dënimi për këto vepra mund të shkojë deri në 5 vjet burgim”.
“Dëmtimet e shkaktuara në xhaminë e hapur të Namazgjahut janë akte kriminale nga njerëz të papërgjegjshëm dhe qyqar”.
“Ftoj Policinë e Kosovës dhe organet e drejtësisë që t’i gjejnë fajtorët në mënyrë që t’i marrin dënimet e merituara”.
“Objektet e trashëgimisë kulturore janë pasuri e përbashkët që e dallojnë Prizrenin si qytet historik dhe për to duhet të kujdesemi sikurse që kujdesemi për shtëpinë tonë”, vlerëson Haskuka./PrizrenPress.com/
