Enver Sulaj
Sa herë vjen prilli
Nuk e di pse dhembja më ngatërrohet me lulet
Me bulëzat në trungun plot lëng.
Sa herë vjen prilli
Nuk e di pse m’i kujton ëndrrat e premtimet që s’u mbajtën kurrë:
As kur fluturuan mbi kokë aeroplanët e fundit
As kur kolona u shtri si gjarpër në tokën e djegur.
Nuk di kush është i marrë
Unë apo prilli i hapave të trishtueshëm
Që m’i la në kujtesë lulet e bulëzat
e imazhin ngjyrë vjollce.
Prill, 2025