Drejtori i Arsimit në Prizren Nexhat Çoçaj është në pritje të interpretimit ligjor nga MASHT-i, për ligjshmërinë e konkursit për drejtorë dhe zëvendësdrejtor të shkollave, që është hapur nga Zyra e Personelit.
“Kam kërkuar interpretim ligjor nga zyra ligjore e MASHT-it, sepse këto çështje janë të rregulluara me ligj”, thotë Çoçaj për “PrizrenPress”.
Zyra e Personelit që vepron në kuadër të Administratës në Prizren, në mbështetje të Ligjit për Shërbyesit civil, më 16 korrik e ka shpallur konkursin për drejtorë dhe zv.drejtorë të shkollave në Prizren.
Ky konkurs ka përplasur dy sektorët komunal, atë të arsimit dhe të administratës publike në Prizren.
Ndërkaq, drejtorët dhe zëvendësdrejtorët e shkollave në Prizren, të cilëve ju ka kaluar mandati, nëse nuk rizgjedhen me konkursin e hapur nga Zyra e Personelit, rrezikohen të mbesin pa punë.
Drejtori i Arsimit në Prizren Nexhat Çoçaj thotë se nëse drejtorët dhe zëvendësdrejtorët konsiderohen shërbyes civil ashtu sic është hapur konkursi nga Zyra e Personelit, drejtoria që drejton nuk e ka për obligim sistemimin e tyre.
“Nëse konsiderohen shërbyes civil ashtu siç është shpall konkursi, jo sepse, arsimi në përgjithësi ka të bëj me punëtorë profesionist”, tregon Çoçaj për “PrizrenPress”.
“Në të kundërtën po të ishin pranuar në mbështetje të Ligjit të Arsimit Parauniversitar, ka qenë obligim ligjor i DKA-së që të kujdeset për ta”.
Zëdhënësi i Komunës së Prizrenit, Ymer Berisha thotë se komuna nuk ka obligime ligjore ndaj atyre punëtorëve që ju kalon mandati.
“Drejtorët dhe zëvendësdrejtorët e shkollave janë me mandat, prandaj kur të përfundon mandati i tyre, nuk kemi obligim ligjor që të kujdesemi për sistemimin e tyre”, thotë ai./PrizrenPress.com/