Çmimi ”Nobel” në Kimi 2013 iu dha sot Martin Karplus austro-amerikan, Michael Levitt britaniko-amerikan dhe Arieh Warshel izraelito-amerikan, si njohës të modelimit të reaksioneve kimike.
Të tre hulumtuesit janë shpërblyer ”për zhvillimin e modeleve multishkallë për sistemet kimike komplekse”, bëri të ditur juria në një komunikatë për shtyp.
Karplus, 83 vjeç, Levitt 66 vjeç dhe Warshel 72 vjeç i janë referuar në studimin e proceseve kimike fizikës së Njutonit së bashku me fizikën kuantike, që i përgjigjet rregullave kryesore.
Martin Karplus zotëron një post në Universitetin e Strasburgut (Francë).
”Kimistët kanë krijuar edhe më parë modelet e molekulave duke përdorur topa plastike dhe shkopinj. Sot, modelimi është kryer në kompjuter”, shpjegoi
Akademia Mbretërore e Shkencave në një deklaratë për shtyp.
”Modelet informatike që riprodhojnë jetën reale janë thelbësore për shumicën e hulumtuesve të sotëm të kimisë”, theksoi Akademia duke shpjeguar se sot kompjuteri është një mjet mjaft i rëndësishëm për kimistët sesa epruveta e dikurshme.
”Simulimet janë kaq realiste sa parashikojnë rezultatin e eksperiencave tradicionale. Në vitet 1970, Martin Karplus, Michael Levitt dhe Arieh Warshel kanë hedhur themelet për programe të rëndësishme që janë përdorur për të kuptuar dhe parashikuar procesin”, citoi Akademia.