Asnjë lajm për Gani Gecin. Policia deri më tani nuk ka arritur madje as të ketë ide ku mund të jetë personi i dyshuar për vrasjen e Ruzhdi Shaqirit. Edhe pse familjarët e Gecit kanë deklaruar se ai ka shkuar jashtë vendit, Policia po e kërkon atë në territorin e Kosovës.
Madje për ish-deputetin Geci është lëshuar një urdhër arrest nga Gjykata Themelore e Mitrovicës. “Ne kemi urdhër arrestin dhe policia kudo që ta takojë të dyshuarin do ta arrestojë”, tha për Tribunën zëdhënësi i Policisë në Mitrovicë Avni Zahiti.
Sipas tij, hetuesit janë duke hetuar për vendndodhjen e mundshme të Gecit por deri më tani pa rezultat.
“Deri sot (e premte) nuk kemi ndonjë informatë se ku mund të gjendet ai”, tha Zahiti. Gani Geci pasditen e 4 gushtit (e hënë) ka vrarë me armë zjarri 45 vjeçarin Ruzhdi Shaqiri nga fshati Baks i Skenderajt. Ngjarja ka ndodhur afër kafiterisë “N’Qosh” që gjendet në sheshin “Adem Jashari” në këtë qytezë.
Disa orë pas vrasjes tashmë i dyshuari ka thënë për një portal të Kosovës se vrasjen e Shaqirit e ka kryer në vetëmbrojtje. Por policia thotë se nuk ka prova se i ndjeri ka pasur armë me vete.
“Ne nuk kemi gjetur asnjë dëshmi në vendin e ngjarjes se viktima Ruzhdi Shaqiri ka pasur armë me vete”, tha Zahiti. /Tribuna/