Xherdan Shaqiri e njeh shumë mirë skenën e Ligës së Kampionëve, pasi ka triumfuar me Bayern Munichun.
Por, për të ishte ndeshje debutuese paraqitja e mbrëmshme kundër PSG-së me fanellën e Liverpoolit.
Ai u inkuadrua në lojë në vend të Mohamed Salah në minutën e 85’, menjëherë pasi Parisi barazoi shifrat në 2-2 dhe ndihmoi të tijtë të fitojnë në fund 3-2.
Shaqiri nuk po luan shumë dhe e pranon se ka shumë konkurrencë në skuadër, por ia ka bërë me dije Jurgen Kloppit se po punon shumë që të ketë më shumë minuta.
“Kemi shumë ndeshje këtë vit. Kemi skuadër të fortë dhe konkurrenca në futboll është gjithmonë e pranishme”, tha ai.
“Kanë ardhur gjithashtu lojtar të rinj, kështu që unë do të mundohem gjithmonë të punoj shumë në stërvitje dhe të bëj më të mirën në ndeshje kur të inkuadrohem, që t’ia bëj punën më të vështirë trajnerit”, shtoi ai mes tjerash.