Ministria për Kulturë, Rini dhe Sporte ka hapur konkursin për vitin 2015, për projekte kulturore– artistike.
Në njoftimin e këtij konkursi që është publikuar të hënën mësohet se pjesë e këtij konkursi mund të jenë projektet kulturore-artistike individuale dhe projektet kulturore-artistike grupore (festivalet, bienalet, panairet, ekspozitat dhe manifestimet tjera) me karakter kombëtar dhe ndërkombëtar nga të gjitha fushat e artit.
“Përmes këtij konkursi, Ministria e Kulturës, Rinisë dhe Sportit synon të mbështesë projekt-idetë me karakter: profesional, të cilat me kualitetin e tyre formal dhe përmbajtjesor, i respektojnë standardet krijuese evropiane e botërore; promovues, të cilat kanë për qëllim paraqitjen dhe integrimin e artistëve vendorë në skenën artistike ndërkombëtare; stimulues, të cilat kanë për qëllim evidentimin e talenteve të reja me ide të veçanta kreative; tradicional, përmes të cilave do të promovoheshin vlerat e trashëgimisë sonë kulturore; inovativ, të cilat, me formën, përmbajtjen, frymën dhe mënyrën e realizimit të tyre, paraqesin risi për ambientin tonë krijues; kritik, të cilat me formën dhe përmbajtjen e tyre nxisin debat dhe diversitet artistik; praktik, përmes të cilave do të evidentoheshin dhe formësoheshin kapacitetet krijuese profesionale”, thuhet në këtë njoftim.
Në kuadër të këtij konkursi, me projekt-idetë e tyre kreative, mund të konkurrojnë institucionet kulturore publike, institucionet kulturore private, OJQ-të me karakter kulturor, individët dhe grupet e ndryshme të artistëve.
“Nga ky konkurs përjashtohen projektet filmike, të cilat mund të gjejnë shprehje në kuadër të konkursit të Qendrës Kinematografike të Kosovës, si dhe botimet, të cilat mund ta shfrytëzojnë hapësirën në kuadër të konkursit të Keshillit te librit për botimin e librave”, thuhet ndër të tjera në njoftim.
Projektet konkurruese duhet të realizohen brenda vitit 2015 kurse afati për aplikim është i hapur deri më 16 nëntor. /PrizrenPress.com