Zëvendësministri i Arsimit, Nehat Mustafa, ka theksuar se fillimi i vitit 2014 nuk ka qenë aq i mbarë për arsimin në Kosovë, meqë janë shtuar ballafaqimet fizike mes nxënësve, si pasojë e të cilave njëri ka ndërruar jetë.
Mustafa tha për Telegrafin se Ministria e Arsimit, Shkencës dhe Teknologjisë, është duke bërë përpjekje që rastet e tilla të mos përsëriten nëpër shkollat e Kosovës.
“Ministria, menjëherë pas rastit që ndodhi në Mitrovicë, kur një nxënës vret një tjetër, ka realizuar takime me Policinë e Kosovës, me Sindikatën e Arsimit dhe me Këshillin e Prindërve. Palët janë pajtuar që përgjegjësia për luftimin e këtyre fenomeneve është e të gjithëve, duke filluar nga shkollat, prindërit, deri te MASHT-i”, ka thënë Mustafa, për Telegrafin.
Ndryshe, të martën, pas një përplasjeje në mes dy bashkëmoshatarëve, ka humbur jetën Astrit Syla, nxënës i shkollës së mesme “Arkitekt Sinani” në Mitrovicë. Ndërsa, dje ndodhi edhe një therje tjetër e një nxënësi të klasës së nëntë, në shkollën “Hilmi Rakovica” në Prishtinë.