Një ditë pas tragjedisë në Termocentralin “Kosova A” kanë filluar hetimet serioze për të zbuluar shkaktarët e shpërthimit që mori jetën dy personave.
Ekipet e forenzikës kanë dalë në vendin e ngjarjes për të hetuar rastin. Mirëpo, zyrtarët e KEK-ut ende nuk kanë ndonjë risi për të ditur se si ka ndodhur shpërthimi, raporton KTV.
Edmond Nulleshi, drejtor i shërbimeve në KEK, ka thënë se nuk është mirë të jepen deklarata se një shpërthim i tillë është paralajmëruar më herët. Ai ka deklaruar se janë në dijeni se në një sektor të tillë nuk punohet edhe pa rrezik, mirëpo, sipas tij, çdo gjë ka qenë e siguruar.
Ndërkohë, elektroliza, aty edhe ku ka ndodhur shpërthimi, është ndërtuar në vitin 1975 dhe ka shërbyer si një instrument për ftohjen e gjeneratorit për një prodhim efiçient të energjisë elektrike.