Kosova mund të bëhet pjesë e Organizatës së Kombeve të Bashkuara, mirëpo këtë mund ta arrijë vetëm nëse angazhohen më shumë institucionet në këtë drejtim, thonë njohës dhe përfaqësues të shoqërisë civile. Sipas tyre, përgatitja e një strategjie serioze dhe koordinimi me faktorin ndërkombëtar do të çonte drejt realizimit të këtij synimi.
Fisnik Korenica, nga Grupi për Studime Juridike dhe Politike, i tha KTV-së se bisedimet nuk i sollën këto rezultate, pavarësisht se është hyrë në to me qëllime të tilla.
Profesori i shkencave politike, Bekim Baliqi tha se ka ardhur koha kur Kosova duhet të aplikojë për anëtarësim në OKB dhe këtë, sipas tij, duhet ta bëjë më së largu deri në qershor të vitit 2014.
Korenica dhe Baliqi thonë se Kosova nuk ka një strategji se si të anëtarësohet në OKB, prandaj, sipas tyre, duhet një angazhim më i madh shtetëror dhe një koordinim ndërkombëtar për një çështje të tillë.
Ministri i Jashtëm, Enver Hoxhaj ka paralajmëruar se në vitin e ardhshëm do të nisin procedurat për anëtarësim në OKB.