Në një fshat në Indinë veriore të përfshirë nga Covid-19, i sëmuri shtrihet në katua, nën një pemë dhe serumi pikon i varur në degë. Lopët kullosin rreth e rrotull, ndërsa shiringat dhe paketat boshe të ilaçeve janë shpërndarë në tokë.
Nuk ka asnjë mjek ose institucion shëndetësor në fshatin Meëla Gopalgarh në shtetin më të populluar të Indisë, Uttar Pradesh, 90-minuta larg me makinë nga kryeqyteti kombëtar Delhi.
Aty afër është një spital shtetëror, por nuk ka shtretër në dispozicion dhe fshatarët thonë se nuk kanë mundësi për në klinikat private.
Në vend të kësaj, praktikuesit në fshat të mjekësisë alternative kanë ngritur një klinikë në ajër të hapur ku ata shpërndajnë serum dhe kurat e tyre për pacientët me simptomat e Covid-19.
Disa besojnë se shtrirja nën pemën Neem, e njohur për vetitë e saj medicinale, do të rrisë nivelet e tyre të oksigjenit. Nuk ka asnjë bazë shkencore për këtë besim ose për disa nga kurat që ofrohen.
“Kur njerëzit mbeten pa frymë, ata duhet të shkojnë nën pemë për të rritur nivelet e tyre të oksigjenit”, tha Sanjay Singh, babai 74-vjeçar i të cilit vdiq disa ditë më parë pasi kishte temperaturë. Singh tha se babai i tij nuk u testua dhe vdiq brenda dy ditësh.
“Njerëzit po vdesin dhe askush nuk mund të kujdeset për ne”.
Vala e dytë shkatërruese e infeksioneve në Indi, e cila ka mbushur plot edhe spitalet në qytete të mëdha si Delhi, po përshkon zonat e gjëra rurale të vendit ku kujdesi shëndetësor është i varfër.
Kryeministri Narendra Modi, i cili po përballet me kritika për dështimin për t’u përgatitur për valën e dytë, tha në një fjalim javën e kaluar se pandemia po përhapet me shpejtësi në fshatra dhe u bëri thirrje njerëzve të mos i injoronin simptomat.
“Bëni testin, izolohuni dhe filloni ilaçet në kohë,” tha ai.
Por në këtë fshat, njerëzit po bëjnë sa më mirë që të munden. Një grua kishte marrë hua një bombolë oksigjeni nga një fqinj, gjendja e të cilit ishte përmirësuar pak, tha familja e saj.
“E vërteta është, nuk ka pasur teste COVID-19. Ne jemi përpjekur por ata na thanë se nuk kanë staf të mjaftueshëm,” tha 48-vjeçari Yogesh Talan, një ish-kryetar i fshatit.