Gjykata Themelore në Prizren, shpalli fajtor të akuzuarin Qamil Halilaj. nga Republika e Shqipërisë, për shkak të veprës penale “Dhënia e ryshfetit”.
Drejtësia Sot, raporton se ndaj të akuzuarit u shqiptua dënim me gjobë në shumë prej 200 euro dhe dënim me burgim të cilit i’u zëvendësuar me gjobë prej 400 euro.
Gjithashtu, i akuzuari lartcekur obligohet që të paguaj shpenzimet procedurale në emër të paushallit gjyqësor shumën prej 50 euro dhe në emër të fondit për kompensimin e viktimave të krimit shumën 50 euro.
Gjykata vendosi që të akuzuarit t’i konfiskohet kartëmonedha e shumës prej 10 (dhjetë euro), si objekt me të cilin është kryer vepra penale.
Drejtësia Sot, njofton se gjykata deri tek ky vendim erdhi pasi që, i akuzuari pranoi fajësinë për veprën penale për të cilën akuzohej.
Në seancën e shqyrtimit të dytë, gjyqtarja e çështjes Raima Elezi vendosi që ta aprovoj pranimin e fajësisë si dhe i shqiptoj të akuzuarit dënimin e theksuar si më lartë.
Ndryshe, sipas aktakuzës së Prokurorisë Themelore në Prizren, Qamil Halilaj, akuzohet se me 06.08.2021, rreth orës 05:55 minuta në pikën kufitare në Vërmicë, ashtu që në mënyrë të drejtpërdrejtë i ofron personit zyrtar pasaportën për të kontrolluar, ku në të kishte futur shumën e te hollave prej dhjetë euro (10) si dhuratë te paarsyeshme në mënyrë që personi zyrtar të mos veproj në pajtim me detyrën e tij zyrtare.
Në pyetjen e zyrtarit policor se çfarë janë këto të holla, ai i është përgjigjur me fjalët janë për ju, për të pirë një kafe, me ç’rast i njëjti është ndaluar nga policia ku edhe i janë sekuestruar përkohësisht dokumentet e tij personale dhe kartëmonedha prej 10 eurove.
Drejtësia Sot