Haziz Hodaj
Sot, më 12 qershor, përulemi me ndjenjë të veçantë dhe krenari përpara një date që shënon një kthesë historike për qytetin tonë – Ditën e Çlirimit.
Prizreni, me rrënjë të thella historike, ka qëndruar gjithmonë në ballë të përpjekjeve për liri, pavarësi dhe demokraci. Çlirimi i Prizrenit, më 12 qershor 1999, nuk ishte një ngjarje e shkëputur në kohë – ai ishte vazhdimësi e përpjekjeve të mëdha kombëtare që kulmuan për herë të parë më 1878, me lëvizjen e parë politiko-ushtarake dhe themelimin e Lidhjes Shqiptare të Prizrenit, mu në zemër të këtij qyteti.
Lidhja e Prizrenit ishte zëri i parë i bashkimit, i vetëdijes kombëtare dhe i organizimit për mbrojtjen e trojeve shqiptare. Ishte një akt vizionar që hodhi themelet e kërkesës për shtetësi dhe për drejtimin e vetë fatit tonë.
Sot, në këtë përvjetor të çlirimit, ne e shohim Prizrenin si vazhdues të atij ideali – një qytet që i ka dhënë shumë kombit në kulturë, arsim, politikë dhe rezistencë. Liria që e gëzojmë sot është fryt i angazhimit dhe veprës kolosale të Presidentit Historik Ibrahim Rugova, gjakut dhe sakrificës së shumë brezave – e veçanërisht e atyre që sakrifikuan gjithçka gjatë luftës së fundit për çlirimin e Kosovës, e cila u udhëhoq nga Komandanti legjendar Adem Jashari.
Le t’i kujtojmë me nder ata që nuk janë më mes nesh, por që e bënë të mundur këtë ditë. Le ta nderojmë lirinë me përgjegjësi, duke ndërtuar një Prizren të zhvilluar, të barabartë për të gjithë – të denjë për emrin që mban dhe për historinë që përfaqëson.
Urime 12 Qershorin – Ditën e Çlirimit!
Lavdi dëshmorëve të kombit!
E paçim për jetë Prizrenin e lirë dhe të zhvilluar!
Marketing
Kliko Video https://www.facebook.com/PrizrenPress/videos/1728704571859439
