Në prag të festave të fundvitit, përveç shtëpive dhe ambienteve private janë zbukuruar edhe qytetet e Kosovës. Por, sa është buxheti që kanë ndarë Komuna e Prizrenit për sheshe e rrugë festive.
Prizreni sivjet shpenzoi 10 mijë euro për zbukurimin e qytetit.
Laura Suka nga Drejtoria për Shërbime Publike ka thënë se për zbukurimin e qytetit Komuna e Prizrenit ka kontraktuar OE “Multi Bussines Group” SH.P.K.
Suka tutje ka shpjeguar projektin e kontraktuar për stolisjen e qytetit, duke theksuar se edhe kanë ulur shumën buxhetore.
“Projekti për zbukurimin e qytetit të Prizrenit ka qenë një projekt shumë mirë dizajnuar që përmbante një koncept, meqenëse u shpall me kohë por nuk kishte të interesuar në ofertat e shpallura nga zyra e prokurimit. Kështu që herën e fundit ne e ulëm shumën buxhetore pasi që nuk kishim kohë. Tani projekti përfshin vendosjen e tri bredhave: Lokacioni Sheshi i Dëshmorëve, Lokacioni hapësira e gjelbër te qafa e kishës, Lokacioni – Shtëpia e Bardhë”, ka thënë ajo.
Në vitin e kaluar sipas zyrtarëve komunalë, Prizreni kishte mbetur pa e realizuar projektin.
“Në vitin e kaluar nuk kemi pasur realizim të projektit pasi që nuk arritëm të kontraktojmë kompani me procedurë të tenderimit”, thuhet në përgjigjen e Sukës për RTV21.
Ndërsa, dy vjet më parë për zbukurimin e qytetit Komuna e Prizrenit kishte ndarë buxhet prej 30 mijë eurosh.
Për dallim nga kjo, Komuna e Pejës është ajo që nuk ka ndarë asnjë cent nga buxheti i saj për dekorime, të gjitha i kanë bërë bizneset e vendit./