Hashim Thaçi nuk do të ndihet në siklet si Enver Hoxhaj, gjatë raportimit në komisionin parlamentar për Punë të Jashtme, për punën e tij si ministër. Kjo për faktin se partia e tij do ta udhëheqë këtë komision. Kësisoj, Thaçi ka arritur t’i shmanget përplasjes së mundshme me liderin e Lëvizjes Vetëvendosje Albin Kurti, i cili në legjislaturën e kaluar ishte kryetari i këtij komisioni. Përveç këtij komisioni, koalicioni PDK dhe LDK kanë arritur t’i vendosin njerëzit e tyre, në komisionet më të rëndësime në Kuvend. Kjo metodë e përzgjedhjes së komisioneve të ‘forta’ nga partitë në pushtet, po vlerësohet e gabueshme nga njohës të çështjeve politike në vend. Sipas tyre, kjo është edhe një tendencë për t’i ikur përplasjeve më përfaqësuesit e partive opozitare, ashtu siç kishte ndodhur në legjislaturën e kaluar.
Dren Doli nga Klubi për studime juridike politike, vlerëson se nuk është rastësi zgjedhja e Komisionit për Punë të Jashtme nga ana e PDK-së. Sipas tij, ministri i Jashtëm Hashim Thaçi me qëllim i ka ikur përplasjes me Albin Kurtin e Lëvizjes Vetëvendosje.
“Hashim Thaçi me çdo kusht tentoi të përjashtojë nga marrja në pyetje për veprimtarinë e tij si ministër i Jashtëm nga ana e Albin Kurtit. Dhe përzgjedhja e komisionit të parë të këtij komisioni që ka bërë PDK-ja, tregon tendencën e Thaçit për t’i ikur në maksimum kritikave të partive opozitare”, ka thënë Doli…/tribuna/