Shtetasi Burim Sejdiu, bashkë me bashkëshorten e tij dhe vajzën e tyre ka tentuar që nëpërmjet aeroportit ndërkombëtar të Prishtinës të udhëtoi për në Stamboll të Turqisë, e nga aty më pas t’i bashkohet organizatës terroriste ISIS.
Ndonëse Burimi kishte paguar tri bileta aeroplani dhe ishte bërë gati që të futej në aeroplan me datën 1 gusht të këtij viti, qëllimi i udhëtimit të tij u zbulua nga pjesëtarët e Policisë Kufitare të Kosovës. Burimi përfundoi në pranga përderisa bashkëshortja e tij bashkë me vajzën u lanë në liri deri në përfundimin e hetimeve. E pasi kaluan dhjetë ditë nga ky rast, Prokuroria Speciale e Republikës së Kosovës te premten ka ngritur aktakuzë kundër të pandehurit në fjalë për veprën penale “Organizimi dhe pjesëmarrja në grup terrorist”, në tentativë.
Udhëtimi i organizuar
“Pranë Departamentit për Krime të Rënda të Gjykatës Themelore në Prishtinë, Prokuroria Speciale e Republikës së Kosovës, ka ngritur aktakuzë kundër të pandehurit Burim Sejdiu, për kryerjen në tentativë të veprës penale: “Organizimi dhe pjesëmarrja në grup terrorist”, nga neni 143 par. 2 lidhur me nenin 28 të Kodit Penal të Republikës së Kosovës”, thuhet në komunikatën për media të prokurorisë speciale…/tribuna/