Në fillim të nëntorit të vitit 1998, në udhëkryqin e Apterushës së Rahovecit, ranë heroikisht Xhelal Hajda-Toni, Selajdin Mullabazi-Mici, Hamdi Hajrizi, Bektesh Haliti dhe Nezir Ymeri. Ata u përkujtuan sot nga bashkëluftëtarë, familjarë dhe shumë mysafirë, që nderuan jetën dhe veprën e tyre për liri.
Në Rahovec u përkujtuan dëshmorët e Ushtrisë Çlirimtare të Kosovës me rastin e 26 vjetorit. Toni, Mici, Hamdiu, Bekteshi dhe Neziri do të mbeten udhërrëfyes të luftës për liri, thanë bashkëluftëtarët e tyre.
“Ka qenë një goditje shumë e rëndë, sepse ranë dy heronjtë më të spikatur të Rahovecit me bashkëluftëtarët nga Vushtrria, të cilët kishin ardhur të armatosur nga Shqipëria, të lodhur e rraskapitur, të cilët pas një ndeshje frontale me forcat serbe ranë heroikisht duke luftuar deri në momentin e fundit të jetës së tyre”, tha Ejup Kabashi, ish-bashkëluftëtar.
“Ruajtja dhe kultivimi i këtyre vlerave, është obligim i yni i përditshëm dhe ne mund ta përmbushim vetëm me punë të mira e që ndershme në dobi të vendit tonë. Kështu të rënëve tanë ua përmbushim amanetin”, tha Smajl Latifi, kryetar i komunës së Rahovecit.
“Detyra e parë është hyrja në NATO, për të siguruar edhe sakrificën edhe lirinë, e gjithsesi të lindë dielli në liri në trojet tona, por të lindë në paqe”, tha Ramush Haradinaj, kryetar i AAK-së.
Përfaqësuesi i familjarëve të dëshmorëve Ermal Mullabazi, tha se dëshmorët ngelen frymëzim për të vazhduar më tutje drejt unitetit kombëtar.
Me 6 nëntor, te Kryqi i Apterushës tek po ktheheshin nga Rahovecit, pesë dëshmorët bien në pritën e forcave serbe në një afërsi shumë të vogël dhe përjetësinë e marrin Xhelal Hajda-Toni, Selajdin Mullabazi-Mici, Hamdi Hajrizi, Bektesh Haliti dhe Nezir Ymeri.
Që nga ajo kohë në vendin e ngjarjes, automjetet me të cilat udhëtonin pesë dëshmorët, kanë ngelur si një kujtesë e lavdishme ndër breza të qëndresës heroike të bijve dhe bijave kosovare.
Marketing
Përjetoni pushime të paharruar dhe dasma magjike në Hotel “Albes Residence”
