Për ta mbajtur premtimin për rritje të pagave të 228 punonjësve në institucione kulturore dhe të trashëgimisë kulturore, ministri i Kulturës, Kujtim Gashi, ia ka mësyrë buxhetit të investimeve kapitale.
Kreut të institucionit më të lartë kulturor në vend i janë mbyllur dyert e tjera dhe e vetmja mundësi për rritje pagash, sipas tij, është sakrifikimi i disa prej projekteve kapitale që janë planifikuar për këtë vit. Por edhe një gjë e tillë do të jetë zgjidhje afatshkurtër, shkruan sot Koha Ditore.
“Pa ndonjë shqetësim, këtë zgjidhje do ta bëjmë brenda buxhetit të MKRS-së, natyrisht duke larguar ndonjë projekt kapital, i cili për momentin ndoshta nuk është shumë prioritet për ne”, ka thënë Gashi në konferencën e fundvitit për media. Të njëjtën e ka përsëritur edhe të enjten për gazetën. Ata që kanë qenë të zëshëm për ngritje të pagave janë të ndarë sa i përket kësaj çështjeje.