Profesori i historisë së marrëdhënieve ndërkombëtare në Universitetin e Prishtinës, Ibrahim Gashi, ka thënë se deklarata e Edi Ramës është keqkuptuar me qëllim nga Serbia.
“Vetëm në Serbi e kanë lexuar kontekstin e një bashkimi klasik midis dy vendeve tona. Konteksti i vërtetë i asaj çfarë ka thënë kryeministri Rama ka të bëjë me rrugën që kanë Shqipëria dhe Kosova drejt një procesi të integrimit në Bashkimin Evropian”, ka vlerësuar Gashi për “Epokën e re”. Derisa reagimi i BE-së, sipas tij, ka qenë një lloj mase qetësuese për ta ruajtur klimën e bashkëpunimit në rajon.
Edhe profesori tjetër universitar, Ismail Hasani, ka thënë se reagimet nga Serbia vijnë e bëhen më të ashpra, pasi tani “është kuptuar se shqiptarët janë faktorë në Ballkan”. Ai i cilëson këto reagime si të natyrshme, deri-diku, “për faktin se Serbia në një mënyrë është ndërgjegjësuar se entiteti shqiptar në Ballkan është faktor që nuk guxon të injorohet”.