Në Prizren do të nisë edicioni i 22-të i festivalit ndërkombëtar i filmit DokuFest.
Organizatorët janë bërë gati për të mirëpritur mysafirët nga industria e filmit dhe audiencën besnike nga të gjitha anët.
“Përgatitjet finale janë bërë në kinematë, prandaj dhe tani gjithçka është gati edhe për një udhëtim të jashtëzakonshëm kulturor, i cili do të ofrojë përvoja të reja dhe të paharrueshme për secilin”, thuhet në njoftimin e bërë në faqen e festivalit.
Marrëdhënia ndërmjet njeriut dhe Inteligjencës Artificiale do të jetë tema qendrore në këtë edicion.
Sipas Veton Nurkollarit, drejtorit artistik, festivali sjellë një tjetër program të jashtëzakonshëm të filmave që do të shqyrtojnë shumë gjëra dhe marrëdhënie, prej njerëzve te natyra dhe deri te teknologjia.
“Këtë vit do t’i kushtojmë një vëmendje të veçantë Inteligjencës Artificiale duke filluar nga tema dhe identiteti vizual, pastaj filmat dhe diskutimet, për të eksploruar se ku është shoqëria në raport me këto zhvillimet e fundit”, ka thënë ai.