Zyra e USAID-it në Kosovë, ka kontribuar edhe në ndriçimin e 3.5 kilometrave rrugë në Komunën e Rahovecit. Projekti ka kushtuar mbi 107 mijë euro, ku edhe komuna ka participuar me 21 mijë euro. Sfidë për këtë komunë ngelet ndriçimi i fshatrave.
Populli amerikan ka kontribuar në zhdukjen e errësirës në qytetin e Rahovecit. Nëpërmjet zyrës së USAID-it, është mundësuar që mbi 3.5 kilometra rrugë, të pajisen me ndriçim publik. Në përfundimin e këtij projekti mori pjesë edhe drejtoresha e USAID-it , Maurin Shauket, e cila shpreson që, ky ndriçim të sjellë gjallëri edhe në orët e natës në këtë komunë.
Kreu i komunës së Rahovecit Smajl Latifi, tha për RTK-në se ndihma e popullit amerikan, ka ardhur gjithmonë kur ne kemi patur më shumë nevojë për të.
Ndonëse projekte të tilla përfundojnë me sukses, ata duhet edhe të mirëmbahen. Për këtë drejtori i shërbimeve publike Përparim Krasniqi, thotë se është menduar, po ashtu, do të fillojë puna për ndriçimin e pjesës tjetër të qytetit dhe disa fshatrave.
USAID-i në Komunën e Rahovecit, ka kontribuar edhe në blerjen e pajisjeve thelbësore të Kuvendit Komunal, ka mbështetur zyrën e informimit, gjithashtu ka ndihmuar edhe në funksionalizimin e qendrës për shërbim të qytetarëve, menaxhimin e mbeturinave të gurta, menaxhimin e shpenzimeve të automjeteve komunale nëpërmjet GPS e shumë projekte të tjera.