Kryetari i ri i sapozgjedhur i komunës së Rahovecit, Idriz Vehapi, në takimin me strukturat e Partisë Demokratike të Kosovës (PDK), Dega në Rahovec, i ka falënderuar të gjithë anëtarët e simpatizantët e kësaj partie për besimin e dhënë dhe për përkrahje të parezervë në zgjedhjet e 3 nëntorit dhe balotazhin e 1 dhjetorit.
Gjithashtu, Vehapi i ka falënderuar edhe votuesit e subjekteve të tjera, të cilët e kanë votuar atë, si dhe i ka falënderuar të gjithë qytetarët e komunës për mbarëvajtje të zgjedhjeve. “Do të jem kryetar i të gjithë qytetarëve të komunës së Rahovecit. Të tillë edhe e kam marr besimin e qytetarëve në zgjedhjet që sapo i lamë pas. Do të punoj me përkushtim të madh për t’iu shërbyer qytetarëve të komunës sime, si në fshatra ashtu edhe në qytet, sepse ata e meritojnë një shërbim dhe përkrahje më të mirë, sepse janë punëtorë dhe të zellshëm”, ka deklaruar kryetari Vehapi, shkruan Epoka e re.
Ai ka shtuar se me ta bërë betimin si kryetar i ri për mandatin katërvjeçar do ta fillojë punën me intensitet të madh sepse, sipas tij, në komunën e Rahovecit punët paksa janë grumbulluar në lëmenj të ndryshëm.
“Nuk do ta ofendoj askënd. Do të bashkëpunoj me të gjitha subjektet politike. Do të bashkëpunoj me strukturat e PDK-së në Rahovec dhe me ekspertë të fushave të ndryshme. Me një fjalë, do të bashkëpunoj me të gjithë dashamirët e komunës në mënyrë që Rahoveci të ecë drejt përparimit, drejt zhvillimit, drejt integrimit e të mos mbetet me borxhe si deri tani, por t’u krijohet qytetarëve një mirëqenie më e mirë sepse ata e meritojnë këtë. Andaj i lus të gjithë të punojmë së bashku për një Rahovec më të zhvilluar”, është shprehur Vehapi.
Ai e ka falënderuar edhe Qeverinë e Republikës së Kosovës dhe kryeministrin Hashim Thaçi, të cilin Vehapi e ka quajtur mikun e Rahovecit, i cili ka dhënë dhe do të japë përkrahje në shumë fusha.