Lëvizja Vetëvendosje! në Prizren sot ka takuar përfaqësuesit e Orkestrës së Qytetit, drejtorin Blerim Sopi drejtor dhe dirigjentin Nazim Tara. Në këtë takim u diskutua për kërkesën e kahëmotshme të tyre për rregullim institucional të çështjes së orkestrës së qytetit.
Kandidati i VV-së për kryetar të Prizrenit, Arbër Rexhaj tha se muzikantët e qytetit janë pasuri kulturore e jona, prandaj duhet t’i trajtojmë si të tillë. “Ka ardhur koha që fraza verbale “Prizreni qytet kulturor” të vuloset me veprime konkrete duke e bërë Prizrenin përnjëmend të tillë”, tha Rexhaj.
Duke e pasur parasysh karakterin tradicional të saj si dhe nevojën e mbështetjes së muzikantëve të qytetit, VV në Prizren konsideron se kërkesat e tilla janë të drejta dhe se mbështetja ndaj tyre paraqet dëshmi të përkujdesjes publike ndaj kultivimit të vlerave artistike dhe shpirtërore që qyteti i Prizrenit i ka gjeneruar në vazhdimësi./PrizrenPress.com/