Kryetari i Nismës në Prizren, Zafir Berisha ka ftuar organet e drejtësisë që të fillojnë hetimet për shkeljet që ka gjetur Auditori i Përgjithshëm në Komunën e Prizrenit.
“Organet e drejtësisë duhet të fillojnë hetimet për të gjeturat e Auditorit Përgjithshëm lidhur me keqpërdorimet në Prizren”, thotë Berisha.
Sipas tij, Auditori i Përgjithshëm ka vërtetuar të gjitha konstatimet që Nisma në Prizren, i ka adresuar në drejtim të Qeverisë së Ramadan Mujës.
“NISMA në Prizren në vazhdimësi e ka potencuar, keqpërdorimet, abuzimet dhe skandalet e panumërta që kanë ndodhur në Prizren”, shprehet ai.
“Prizreni vazhdon të qeveriset nga një kryetar i dënuar nga drejtësia për korrupsion dhe shkelje ligjore, i cili përkundër ndëshkimeve, megjithatë vazhdon të mbajë peng zhvillimin e qytetit të Prizrenit, qytet ky tashmë që është shndërruar në fatkeqësi për qytetarët”.
Berisha thotë se skandaleve të njëpasnjëshme të ‘Qeverisë Muja’, ia vë kapakun tragjedia e fundit e ndodhur para disa ditësh, e që për fat të keq ishte tragjike, për Xhenetën 3 vjeve.
“Derisa tani edhe Raporti i Auditorit të Përgjithshëm, i cili ka konstatuar shumë shkelje e që për rezultat kanë keqpërdorimin e taksave të prizrenasve, vërteton qëndrimin tonë të vazhdueshëm, se koalicioni qeverisës në Prizren në krye me të dënuarin Muja, është pjesë e krimit të organizuar në vend”.
“Ky krim ka lënë peng integrimet euroatlantike të vendit, si dhe është bërë pengesë e liberalizimit te vizave për qytetarët e Kosovës”.
“Se kush është në qeveri në Prizren, mjafton të shihen ndërtimet pa leje dhe mbindërtimet në Zonën Historike të Prizrenit si dhe investimet e dështuara, siç është rasti i rrugës ‘Tranziti i ri’, i cili është peng i uzurpimeve, pavarësisht miliona eurove të investuara”.
“Njashtu edhe rruga në lagjen “Tabakhane”, e cila brenda një muaji ndërtohet dy herë, si dhe shumë e shumë shkelje dhe abuzime tjera”.
“Auditori Përgjithshëm mes tjerash konstaton “Përgjegjësia e Menaxhmentit dhe personave përgjegjës për Qeverisje dhe Pasqyrat Vjetore Financiare Kryetari i Komunës dhe Zyrtari Kryesor Financiar janë përgjegjës për përgatitjen dhe prezantimin e drejtë të pasqyrave financiare sipas Standardeve Ndërkombëtare të Kontabilitetit në Sektorin Publik (SNKSP)”.
“Ky kontatim është i mjaftueshëm për me kuptu përgjegjësin e kryetarit dhe varësve të tij”.
“Qytetarët e Prizrenit me të drejtë kërkojnë që kjo shkollë korruptive përfundimisht të shkojë në shtëpi dhe të njëjtit po ashtu të përballen me drejtësinë për shkeljet dhe për dëmin që u kanë shkaktuar qytetarëve, në mënyrë që krenaria tashmë e zbehur e e këtij qyteti, të kthehet në mënyrën më meritore”./PrizrenPress.com/