Zafir Berisha do të jetë kandidat për deputet të Kuvendit të Kosovës nga koalicioni AAK-Nisma+, në zgjedhjet e 9 shkurtit 2025.
Ai, në këtë garë zgjedhore, synon të fitojë mandatin e katërt të deputetit të Kuvendit të Kosovës.
“Po, do të jem kandidat për deputet në zgjedhjet parlamentare,” ka konfirmuar Berisha për “PrizrenPress”.
Presidentja e Kosovës, Vjosa Osmani, e ka dekretuar 9 shkurtin e vitit 2025 si datë për mbajtjen e zgjedhjeve të rregullta parlamentare. Këto zgjedhje pritet të përcaktojnë drejtimin politik të Kosovës për vitet e ardhshme.
Zafir Berisha aktualisht është kryetar i Nismës në Prizren. Pas përfundimit të luftës, ai ka qenë pjesë e proceseve politike në vend. Në tre mandate ka qenë deputet i Kuvendit të Kosovës.
Më 17 shkurt 2008, në cilësinë e deputetit, pati nënshkruar edhe aktin e Pavarësisë së Kosovës.
“Besoj se pas 9 shkurtit sërish do të jem pjesë e Kuvendit të Kosovës,” shprehet Berisha.
Sipas tij, koalicioni AAK-Nisma+ është një garanci për rikthimin e besimit në institucionet e vendit.
“Në ballë të koalicionit AAK-Nisma+ qëndrojnë personalitetet e punës dhe veprave më të mëdha të Kosovës,” tha ai.
Sipas tij, në katër vitet e fundit, vendi është dëmtuar nga “adoleshenca politike e pushtetit”.
“Kosova është futur në krizë nga politika adoleshente e Vetëvendosjes. Prandaj, më 9 shkurt 2025, besoj se qytetarët do ta ndërpresin politikën e fëmijëve, duke votuar njerëzit që e kanë çliruar dhe zhvilluar vendin,” tha Berisha./PrizrenPress.com/
Marketing
Përjetoni pushime të paharruar dhe dasma magjike në Hotel “Albes Residence”
Kompleksi ‘Newco Elan’ ofron banesa të ëndrrave tuaja në zemër të Prizrenit
