Në dokumentet e dosjes së Portës së Lartë për Isa Boletinin nuk flitet drejtpërdrejt për betejën e zhvilluar në Boletin natën e 21 nëntorit 1908, që zgjati deri në orët e vona të ditës së nesërme.
Siç dihet, nga dokumente të proveniencave të tjera, forcat osmane me rreth 1.500 ushtarë vunë në përdorim edhe topat duke bombarduar pandërprerë kullën e tij në Boletin.
Gjatë këtyre përleshjeve forcat osmane patën disa të vrarë, karshi 3 dëshmorëve shqiptarë që ranë në këtë fushëbetejë. Ndërkaq kulla e Isa Boletinit u rrënua për herë të dytë. Ky drejtues i Lëvizjes së kryengritjeve, ndonëse mori plagë të rënda, ia doli me bashkëluftëtarët e tij të çante rrethimin dhe të kalonte në Rrafshin e Dukagjinit. Për këtë flasin gjerësisht burimet austriake e bullgare.
Konsulli austriak në Mitrovicë thotë se “Isa Boletini, me taktikën dhe me guximin e rrallë vuri në pikëpyetje vlerat e ushtrisë osmane, sepse, sipas tij ‘4 batalione pushkatarësh, një batalion këmbësorie dhe shumë topa nuk ia dolën në betejën 24-orësh ta mposhtin Isa Boletinin me 10-15 bashkëluftëtarë të tij besnikë’ (Raport i konsullit austro-hungarez nga Mitrovica, 3 dhjetor 1908). Vlerësim të ngjashëm ka dhënë edhe konsulli bullgar në Shkup (Raport 10 dhjetor 1908)…/koha ditore/