Komuna e Prizrenit ka anuluar aktivitetin e prokurimit për realizimin e vizitës së kuvendarëve në Republikën e Turqisë.
Në njoftimin për anulim, organet komunale si arsyetim kanë cekur dispozitat e Ligjit për Prokurimin Publik si dhe vendimin e Organit Shqyrtues të Prokurimit lidhur me këtë aktivitet.
OShP-ja në fund të javës së shkuar përmes një vendimi ka hedhur poshtë si të palejuar ankesën e një operatori ekonomik të parashtruar për këtë aktivitet të prokurimit, dhe njëherësh ka lejuar autoritetin kontraktues që të vazhdojë me procedurën.
Shefi i Zyrës së Prokurimit në Komunën e Prizrenit, Isa Osmankaj ka sqaruar se ky aktivitet i prokurimit është anuluar për shkak se nuk ka pas oferta të përgjegjshme, dhe se lidhur me këtë çështje është adresuar një ankesë në OShP.
“Duke qenë se ne kemi anuluar aktivitetin e prokurimit për shkak se nuk kemi pranuar oferta të përgjegjshme, ka pasur ankesë në OShP, dhe e njëjta ankesë është hedhur si e palejuar. Prandaj pas vendimit të OShP-së përmes njoftimit kemi konfirmuar anulimin e aktivitetit të prokurimit për realizimin e vizitës së punës së kuvendarëve në Republikën e Turqisë”, ka thënë Osmankaj për Telegrafin.
Përjetoni pushime të paharruar dhe dasma magjike në Hotel “Albes Residence”
Në tenderin e shpallur muaj më parë nga Komuna e Prizrenit, parashihej realizimi i një vizite pune me qëndrim 5 ditor për 41 anëtarët e Kuvendit të Komunës së Prizrenit si dhe 4 punëtorëve të Komunës për në Republikën e Turqisë.
Vlera e parashikuar e kontratës ka qenë 27 mijë euro, raporton Telegrafi.
“Do të organizohet vizitë pune katër ditë në Turqi dhe një ditë në Selanik të Greqisë”, thuhej në njoftimin për kontratë.
Në vitet e shkuara aktivistët e shoqërisë civile kanë bërë thirrje që mjetet nga buxheti komunal i Prizrenit të shfrytëzohen për ngritje të kapaciteteve të kuvendarëve dhe jo për shëtitje pa agjenda të strukturuara me qëllim të përfitimit të përvojave të dobishme. /Telegrafi/
