Gjykata e Krimeve të Rënda e Tiranës dha sot vendimin për Konstandin Xhuvanin, i akuzuar për vrasjen e katërfishtë në lokalin Antegrand në rrugën e Elbasanit në nëntorin e vitit të kaluar.
Djali i ish– deputetes, Luiza Xhuvani është dënuar me 35 vite burg për vrasjen e Enea Xhait, Edison Jahos, Arbër Demirajt dhe Paolo Azolës.
Në bazë të provave të administruara dhe dëshmive nga roja i sigurisë Anton Binaku dhe personave të tjerë Gjykata ka vlerësuar se Konstandin Xhuvani është personi që ka qelluar mbi Enea Xhain dhe Edison Jahon, ndërsa plumbat e dalë nga arma e tij kanë vrarë dhe shokun e tij Arbër Demiraj dhe shtetasin italin Paolo Azola.
I pandehuri kishte kërkuar gjykim të shkurtuar çka u pranua nga Gjykata, duke shpëtuar të akuzuarin nga burgimi i përjetshëm. Gjykata e dënoi Xhuvanin edhe për veprën penale të armëmbajtjes pa leje. /Tv Klan/