Ekipi i Task Forcës Speciale ka konfirmuar se është e gatshme të ngrit aktakuzat, në momentin e themelimit të Gjykatës Speciale.
Zëdhënësi i kësaj Task Force, Joao Sousa, i ka konfirmuar Radio Kosovës vazhdimin e hetimeve.
“Përderisa hetimet tona janë duke vazhduar, është e padrejtë nga ana jonë të spekulojmë apo komentojmë më shumë. Hetimet tona kanë të bëjmë me përcaktimin e asaj nëse personat janë përgjegjës për ndonjë krim rreth akuzave që dalin nga raporti i Dick Martyt”, ka thënë ai.
Mediat në vend kanë raportuar se tre ish drejtues të lartë të UÇK-ës, të cilët thuhet se janë pjesë e politikës, janë vënë në shënjestër të kësaj Task-Force të BE-së.
Javën e kaluar Qeveria Kosovës ka marrë vendim që të dërgojë në Kryesinë e Kuvendit të Kosovës dy amendamentet kushtetuese që i hapin rrugë themelimit të Gjykatës Speciale për Kosovën. Për themelimin e Gjykatës Speciale, Kuvendi i Kosovës duhet të bëjë ndryshime kushtetuese, gjë për të cilën nevojiten 2/3 e votave të shumicës dhe 2/3 e votave të pakicës.
Deri më tani, një numër i deputetëve të pozitës dhe opozitës janë shprehur se nuk do të votojnë Ligjin për themelimin e Gjykatës që cila pritet të ketë dy dhoma: një në Kosovë dhe tjetrën në Holandë. Në rast se Kosova nuk e themelon vet Gjykatën Speciale, atë do ta bëjë Organizata e Kombeve të Bashkuara. /RK/