Lideri i Partisë Demokratike të Kosovës, Hashim Thaçi, nesër do ta ketë ditën, ndër më të rëndat në jetën e tij. Pas rritjes së presionit të vazhdueshëm ndërkombëtar për themelimin e Gjykatës Speciale, Hashim Thaçi nesër pritet që të takohet me deputetët e tij në ora 10:00, ku pritet që të mundohet t’i bind ata që të votojnë pro kësaj gjykate.
Burime ndërkombëtare i kanë thënë Gazetës Blic se Hashim Thaçi ka ultimatum që para se të shkoj Kuvendi në pushime, duhet të bind deputetët e tij të votojnë pro amendamentit kushtetues, i cili do t’i hapte rrugë themelimit të Gjykatës Speciale.
“Z. Thaçi është zotuar se do të bëjë përpjekje maksimale për të bindur deputetët e partisë së tij që të votojnë pro Speciales”, tha ky burim.
Ndërkohë, sot Gazeta Blic gjatë ditës ka raportuar se sipas të gjitha, të enjten Kuvendi i Kosovës do ta qes për votim edhe njëherë amendamentin kushtetues për themelimin e Gjykatës Speciale.
Takimin e nesërm për Gazetën Blic e ka konfirmuar edhe një deputete e PDK-së, në kushte anonimiteti. Ajo ka thënë se kanë ftesë që nesër në ora 10:00 të mbledhen deputetët e PDK-së, ku do të diskutojnë për themelimin e Gjykatës Speciale.
PDK edhe gjatë ditës së sotme i kishte mbledhur deputetët e saj për të diskutuar për këtë çështje, mirëpo ende nuk ka konsensus.
Deputeti i PDK-së, Fadil Demaku ka thënë për Gazetën Blic se ai nuk do ta ndryshoj qëndrimin e tij, pra do të votoj kundër.
Edhe deputeti Bekim Haxhiu- Kamishi u ka thënë medieve se ai sërish do të votoj kundër.
Kundërshtimin e tyre për Gjykatën Speciale, edhe nëse do të riprocedohet sërish në Kuvend e kanë shprehur edhe deputetja Ganimete Musliu, deputeti Nait Hasani, Raif Çela e Nuredin Lushtaku.
Pos tyre këtyre gjashtë deputetëve, edhe shtatë të tjerë të PDK-së, para tri javësh e kishin kundërshtuar themelimin e Gjykatës Speciale.
Derisa Hashim Thaçi po bën përpjekje për të bindur deputetët, mediet ndërkombëtare e akuzojnë pikërisht liderin e partisë më të madhe në vend se po e pengon formimin e saj.
Politiku.eu ka shkruar se Hashim Thaçi dhe pjesa tjetër e elitës politike kosovare, pengojnë hetimet në vrasje, rrëmbim, dhe trafikimin e organeve njerëzore.
Sipas këtij shkrimi, zyrtarët e Bashkimit Evropian, si dhe diplomatët nga SHBA-ja dhe BE-ja, kanë deklaruar se nga themelimi i Gjykata Speciale do të përfitojnë njerëzit e Kosovës, sepse njëherë e përgjithmonë do të pastrojë ‘ajrin’ ndaj akuzave mbi anëtarët dominues në qeveri.
Sipas diplomatëve të huaj, që i citon ky shkrim në kushte anonimiteti, Gjykata Speciale, mund të kontribuojë edhe në spastrimin e zyrtarëve të korruptuar, aktivitetet e të cilëve janë duke e shkatërruar ekonominë e Kosovës.