Tri subjektet opozitare kanë deklaruar se nuk janë të qëndrimit se do t’i besojnë shumë verdiktit që do ta nxjerrë Gjykata Kushtetuese në lidhje me një interpretim ndaj marrëveshjes së arritur në Bruksel, atë të Asociacionit të komunave me shumicë Serbe.
Ditë më parë presidentja Atifete Jahjaga kishte dërguar në Kushtetuese këtë marrëveshje për të vlerësuar nëse ka ndonjë shkelje ligjore apo kushtetuese.
Mirëpo subjektet opozitare thonë se kjo gjykatë do të nxjerrë praktika të ngjashme si ato të më hershmet. Ata thonë se kjo gjykatë nuk është e pavarur dhe është e njëanshme., transmeton zeri.info.
Frashër Krasniqi nga Vetëvendosje thotë se ky subjekt patë dërguar edhe në vitin 2013 marrëveshjen e 19 prillit por pa ndonjë efekt.
“ Në vitin 2013 ne e patëm dërguar në Gjykatë Kushtetuese marrëveshjen e 19 prillit, dhe kjo Gjykatë as nuk e pat marrë në shqyrtim, duke thënë se marrëveshjet e tilla janë jashtë fushëveprimit të Gjykatës Kushtetuese. Pra, është institucion i kapur dhe tashmë e ka humbur kredibilitetin dhe legjitimitetin” ka thënë Krasniqi.
Edhe AAK mendon se nuk do të ketë ndonjë rezultat të mirë nga kjo Gjykatë.
Muharrem Nitaj nga ky subjekt, për “Zërin” thotë se Presidentja është dashtë të intervenoj më herët. Ai thotë se Kushtetuesja është e kapur nga pushteti.
“ Në të shkuarën gjykata ka ditur të jetë instrument në duart e urdhërdhënësve politikë. Nëse ndodhë edhe kësaj here e njëjta gjë, më mirë të mos e kishin dërguar ne kushtetuese fare”ka thënë Nitaj.
I një mendimi të tillë është edhe deputetja nga radhët e NISMA për Kosovën, Shukrije Bytyqi e cila thotë se Kushtetuesja do të jetë e një anshme, shkruan Zeri.info.
“Dihet tashmë qëndrimi i gjykatës kushtetuese, kemi pasur edhe praktika të më hershme ku edhe e ka dëshmuar cilësinë e vet kjo Gjykatë. Ne si subjekt nuk presim diçka të mirë nga ky aspekt sidomos nga Gjykata Kushtetuese” ka thënë Bytyqi./ZËRI